مغامرات خروف العيد

السلامو عليكم،،، اول حاجة كل سنه وانتم طيبيين وعيد مبارك وحجاجكم يرجعوا سالمين وغانمين ان شاء الله،،، اليوم بنحكي على اشوية قصص عن الخرفان،،، عارفين العيد قرب والناس مشغولة بالخرفان مش بالعيد وشوفوا حالكم عاد،،، في الأيام هاذي تكثر الخطب على الخرفان في الجوامع،،، يعني من ناحية المحافظة على نظافة الشوارع والأحياء من بقايا الخرفان ومن ناحية ثانية،،، مواصفات الخروف لازم تكون اسنونه تمام التمام ومش احول ولا اطرش ولا اعرج ولا اهبل وغيره من المواصفات العالمية للخرفان وكان فيه مشكلة لازم تديروا له عملية جراحية ومش حينذبح هل العيد،،، كذلك في هذه الأيام تكثر في الشوارع بيع الشوايات والفحم (بياض) وكذلك العلف والماااااااااااااع دنوس،،، وتوه عاد لازم نخش في الموضوع وخل نبدا في القصص والمغامرات.

القصة الأولى: زي ما نتذكر انه في عيد من أعياد الأضحى،،، رفعنه الخروف للحوش قبل اسبوع من العيد وكان في الحوش مكان ازغير للخرفان،،، يعني براكه يعني زريبة،،، المهم الخروف كان هادي ومنسجم والبراكه مليانه عشب والأخ نازل على العشب نزله وما فيش له اي صوت وساكت،،، المهم يوم العيد في الصبح،،، بدا فيها سن الأمواس وجاء الجزار والسفاح ليذبح ذلك الخروف على القبله،،، المهم الأخ اللي بيذبح الخروف كان شاد الموس في ايده وفتح باب البراكه وخش واول ما خش،،، شكله الخروف عرف انه هذاكه اليومات يوم العيد ولما شاف الموس في يد الراجل،،، بدا يجري والاخ يجري في جرته وبدا فيها النشيد القومي،،، (باااااااع،،، مااااااااااع) لين شديناه،،، وعلى القبلة وسمي بالله وعطاك عمره،،،، مسكين والله كان راجل طيب،،، الله يرحمه.

القصة الثانية: كانت في عرس مش في عيد،،، كانت في عرس واحد صاحب،،، المهم الاخ كان جايب 10 خرفان تقريبا للعرس وحاطهم في الكراج،،، الحوش تصميمه انه باب وبعدين يجيك ساحة اكبيرة وبعد الساحة يجي الكراج فالاخ كان حاط الخرفان جوه الكراج ولما جا يوم الذبح جابوا (بيجو، قلع) بس من دون خيمه،،، يعني الهيكل الحديد امتاع الخيمه موجود لكن ما فيش القماش،،، وكانت المسافات بين الهيكل بعيده،،، والمشكلة انه البيجو ما تقدر تخش من باب الكراج البراني لانه الهيكل عالي،،، فصاحب البيجو اضطر من انه يوقف القلع بره الحوش المهم القلع وقف في نص الباب لكن على يمين ويسار القلع في فتحه وفراغ حوالي 30 سم من الجهتين،،، وبدأت عملية نقل الخرفان من الكراج الداخلي للبيجو بره،،، المهم كان في خمس اشخاص يعني كل شخص حينقل 2 خروف،،، الخروف الأول وصل بسلامة للبيجو والثاني برضوا كذلك الثالث،،، لكن الرابع كان رئيس عصابة الخرفان وهو الراص امتاعهم والمتكتك للخطة الإستراتيجية المهم رفعوه حطوه في القلع واول ما حطوه،،، زي ما قلت الهيكل الحديد متاعه متباعد وفي مسافة اكبيرة،،، المهم صاحبنه الخروف الراص عطاها صالتو من بين حديد الهكيل وبدا يجري في الشارع،،، وبعد كم ثانية الثلاث خرفان اللي كانوا في السيارة لحقوه وبدا فيها الجري وراهم في الشارع والخرفان اللي بقين في الكراج 2 منهم هربن من الفتحة اللي حكيت عليها امتاع 30 سم،،، و2 من الخرفان قعدن يجرن في ساحة الحوش و2 الباقيات كانن مؤدبات وقعدوا في الكراج،،، المهم من بين الأشخاص كان في صاحب له في السعي وخبرة طلع يجري بسرعة 120 وره الخرفان اللي هربوا في الشارع هوه وواحد ثاني والباقين امشوا سكروا باب الكراج وواحد منهم لف الفتحات اللي في هيكل القلع بحبل عشان ما يهربوش الخرفان من اجديد،،، فبعد 3 دقايق جا صاحبه الخبير في السعي وهوه جايب الخرفان ( تح تح تح،،، اششششش ) هذا اللي قاله الصاحب،،، خبير في لغة الخرفان وجابوهم وحطوهم في القلع،،، وقد تم حكم الإعدام على رئيس المؤامرة شنقا وذبحا بالموس واول واحد ولحقوه الجماعة كلهم،،، هذا جزاء كل خروف يدير فيها امفتح.

القصة الثالثة: سامعها من صاحب برضوا،،، يقال والله اعلم في جماعة شروا حولي (خروف) العيد وحطوه في السطاح امتاع الحوش،،، الحوش كان على دور واحد،،، المهم في اليوم اللي قبل العيد،،، الخروف عطاها صالتوا من على السطاح للأرض،،، شوف جوك،،، قال لك الخروف،،، انتحر ولا انموت على الموس،،، وراح فيها الحولي فطيس،،، وراح الحولي.

القصة الرابعة والأخيرة: المهم هاذي صارت قدامي،،، في شارعنه،،، شبوب اسمه فتحي طويله،،، شاحت افلوس الخروف شحته،،، وبعد ما حصل الفلوس امشى شرا بيهم خروف يمشي الحال،،، بس كان خروف من النوع الشيطاني،،، المهم يوم العيد في الصبح زي ما نذكر بعد صلاة العيد،،، الأخ نزل الخروف من العماره للشارع خاطر يذبح غادي ولما نزل الخروف،،، الخروف هرب منه وقعد يجري باتجاه الخط السريع (الشارع العام) وحوشي كان اقريب من الشارع العام،،، المهم انا منسجم قاعدين نسلخوا في الخروف ونسمع واحد ايصرخ بره،،، امسك امسك،،، قلت شنو الموضوع يوم العيد،،، امسك امسك،،، قلت بالك الاخ قاعد يغني امسك حرامي امسك حرامي،،، في صباح العيد،،، ونفتح باب الرئيسي ونلقاه يضغط في ضغط والخروف يجري،،، وقدر ربك انه الخروف يوصل الشارع العام وتجي سيارة تمشي بسرعة وتضرب الخروف،،، وعطاك عمره،،، موقف بايخ للمليون على صباح العيد،،، وفتحي طويلة ضاع خروفه وضاعت احلامه وضاعت امانيه،،، وتي تي زي ما رحتي زي ما جيتي،،، لازم يدفع افلوس الخروف اللي اتسلفها،،، وشوف حالك،،، الظاهر انه الخروف حب ينتحر من على انه ينذبح.

وهاذي هومه مغامرات خرفاني،،، واللي عنده شي قصة يا ريت يحطها...

منقول